پی ایس ایل سیزن 11: پلیئرز آکشن سے قبل مقامی کھلاڑیوں کی ممکنہ کیٹیگریز منظرِ عام پر آ گئیں

پی ایس ایل سیزن 11: پلیئرز آکشن سے قبل مقامی کھلاڑیوں کی ممکنہ کیٹیگریز منظرِ عام پر آ گئیں لاہور: پاکستان سپر لیگ (پی ایس ایل) سیزن 11 کے پلیئرز آکشن سے قبل مقامی کھلاڑیوں کی مجوزہ نئی کیٹیگریز کی تفصیلات سامنے آ گئی ہیں، جن میں کئی بڑے ناموں کی کیٹیگریز میں تبدیلی متوقع ہے۔ ذرائع کے مطابق اسلام آباد یونائیٹڈ کے شاداب خان، عماد وسیم اور فاسٹ بولر نسیم شاہ بدستور پلاٹینم کیٹیگری میں برقرار رہیں گے۔ جبکہ صاحبزادہ فرحان کو گولڈ کیٹیگری میں شامل کیا گیا ہے۔ سلمان علی آغا اور محمد نواز کو ڈائمنڈ سے ترقی دے کر پلاٹینم کیٹیگری میں رکھا گیا ہے۔ وکٹ کیپر بیٹر اعظم خان کی کیٹیگری میں کمی متوقع ہے اور وہ ڈائمنڈ سے گولڈ کیٹیگری میں آ گئے ہیں۔ کراچی کنگز کے حسن علی کو ڈائمنڈ سے ترقی دے کر پلاٹینم کیٹیگری میں شامل کر لیا گیا ہے، جبکہ عباس آفریدی کو پلاٹینم سے ڈائمنڈ میں منتقل کر دیا گیا ہے۔ ذرائع کا کہنا ہے کہ خوشدل شاہ اور عامر جمال اب گولڈ کیٹیگری کا حصہ ہوں گے جبکہ عرفات منہاس کو گولڈ سے سلور کیٹیگری میں رکھا گیا ہے۔ شان مسعود بدستور ڈائمنڈ کیٹیگری میں برقرار ہیں۔ لاہور قلندرز کے شاہین شاہ آفریدی، فخر زمان اور حارث رؤف حسبِ روایت پلاٹینم کیٹیگری میں شامل رہیں گے۔ سلمان مرزا کو گولڈ سے ترقی دے کر ڈائمنڈ میں شامل کیا گیا ہے جبکہ محمد نعیم ایمرجنگ سے سلور کیٹیگری میں آ گئے ہیں۔ پشاور زلمی کے بابر اعظم اور صائم ایوب پلاٹینم کیٹیگری میں برقرار ہیں، تاہم محمد حارث اور محمد علی کو ڈائمنڈ سے گولڈ کیٹیگری میں منتقل کیا گیا ہے۔ ملتان سلطانز کے کپتان محمد رضوان بدستور پلاٹینم کیٹیگری میں شامل ہیں، جبکہ اسامہ میر اور افتخار احمد کو پلاٹینم سے ڈائمنڈ میں رکھا گیا ہے۔ محمد حسنین کو ڈائمنڈ سے گولڈ میں منتقل کیا گیا ہے جبکہ عاکف جاوید کو سلور سے گولڈ کیٹیگری میں ترقی دی گئی ہے۔ کوئٹہ گلیڈی ایٹرز کے فہیم اشرف اور محمد عامر بدستور پلاٹینم میں شامل ہیں، جبکہ ابرار احمد کو ڈائمنڈ سے ترقی دے کر پلاٹینم میں رکھا گیا ہے۔ وسیم جونیئر کو گولڈ سے ڈائمنڈ، عثمان طارق کو سلور سے ڈائمنڈ جبکہ خواجہ نافع اور حسن نواز کو گولڈ کیٹیگری میں شامل کیا گیا ہے۔ پی ایس ایل سیزن 11 کے پلیئرز آکشن سے قبل سامنے آنے والی یہ مجوزہ فہرست ٹیموں کی حکمت عملی اور کھلاڑیوں کی مارکیٹ ویلیو میں ممکنہ تبدیلیوں کا عندیہ دیتی ہے، تاہم حتمی فیصلہ پاکستان کرکٹ بورڈ کی جانب سے کیا جائے گا۔